Karama ya Imani (1Wakorintho 12:9)

Kila mtu aliyeokoka anayo imani.  Imani hiyo ni kipawa cha Mungu (Waefeso 2:8), ni kama mbegu iliyopandwa ndani yetu na kukua.  Imani hii inaanza ndani yetu kwa  kusikia Neno la Kristo(Warumi 10:17).  Imani hii inakuwa kwa njia ya kuzidi kulifahamu Neno na kuzoezwa katika hali mbalimbali kulitumia Neno,yaani kulitenda.

Tunaposema “karama ya Imani” ni imani ya tofauti na ile ambayo kila mtu anayo.  Hii ni imani ‘maalum’ ambayo Roho wa Mungu ana mvuvia mtu katika mazingira fulani ili aseme, au atende jambo lisiliwezekana kabisa kibinadamu.  Baada ya hali hiyo au hitaji hilo kuisha mtu hujikuta katika hali ya kawaida. 

Karama ya imani ni uvuvio wa Roho, ambao unakuja na ufahamu unaojenga ujasiri wa kusema au kutenda jambo fulani ambalo haliwezekani kabisa!  Karama hii mara kwa mara hujidhihirisha pamoja na karama ya miujiza au uponyaji.  Sikiliza ushuhuda huu:

Ilikuwa mwaka 1984 nikiwa kwenye maandalizi ya mkutano nyumbani.  Ilikuwa saa nne asubuhi.  Wakati ninafanya usafi na kuandaa chakula cha wageni ghafla kamba ya jiko la umeme ilivuta chupa iliyokuwa imejaa chai ambayo ilikuwa tayari kwa ajili ya wageni na kuanguka chini kisha chupa ikapasuka na chai ikamwagika, vipande vya chupa vikaonekana.  Ilikuwa haina kazi tena.  Nilipatwa na hasira, na kujiuliza kwa nini hiyo chupa ipasuke wakati huo nikiwa na wageni?  Nikasema yule Mungu aliyeponya vipofu na viwete nilipokuwa kwenye huduma aiponye hii chupa.  Mmoja wa wageni akaniambia mama si jambo la kawaida tu chupa kupasuka? Nikamwambia hapana, nakataa jambo hilo tangu sasa katika jina la Yesu.  Wakasema unakataaje na imeshapasuka?  Nikawaambia mimi sitambui kupasuka kwa hiyo chupa, nikaichukua nikaweka mikono juu yake, nikasema kwa jina la Yesu aliyeponya vipofu na viwete huko nilikotoka wewe chupa uwe mzima sasa. (ufahamu na ujasiri uliomwezesha kutamka maneno haya juu ya chupa hii ilikuwa ni uvuvio wa Roho kwa karama ya imani).  Wale wageni wakanihurumia sana, tena wakacheka.  Wakasema huyu mama amechanganyikiwa, nikasema sijachanganyikiwa Yesu anaponya hata visivyo na uhai.  Ghafla tukasikia kama tetemeko mle ndani na watu wote wakajaa hofu wakanyamaza kimya.  Nikawaambia ileteni chupa sasa ni nzima nikaichukua ile chupa na kuiangalia ndani sikukuta vipande ndani bali chupa mpya.  (Kutokea kwa chupa mpya hii ilikuwa ni muujiza, muujiza ni uumbaji wa kitu kipya, muujiza huu ulifanya kazi na karama ya imani).  Watu waliokuwepo walitubu na kulia wakisema kama Mungu anaweza kuponya chupa isiyo na uhai je si zaidi binadamu mwenye uhai? (Muujiza huu ulikuwa ni ishara iliyowafundisha kwamba Mungu ana uwezo wa kuweza kumponya mtu).  Hapo hapo kulikuwa na mama mwenye ugonjwa wa pumu miaka kumi na tano akasema nimwombee.  Nikamwombea akapokea uponyaji palepale, ni mzima mpaka leo.  Kama Mungu anaweza kuponya   “themos”  isiyo na uhai si zaidi sana mwanadamu?

Kuna ushuhuda mwingine ambao utausoma katika sura inayofuata, unahusiana na mama Mbise kwa uwezo wa Mungu kumwua nyoka kwa ngumi katika jina la Yesu.  Ujasiri aliovikwa kama utakavyoenda kuona ni karama ya imani.  

Petro alipomwambia kiwete kwa jina la Yesu simama utembee (Matendo 3:6), inawezekana Mungu Roho Mtakatifu alimvisha ujasiri na ufahamu wa kutamka neno lile kwa karama ya imani.  Maana kiwete yule alikuwepo siku nyingi kabla, kwa nini hakumwombea siku za nyuma? pengine Mungu alijua kwamba karama ya imani ilihitajika.  Hata hivyo imani zetu pia zinaweza kufanya mambo makubwa si karama ya imani tu, kama tutakavyo ona katika sura za mbele.